Dipuzkoako Ahaldun Nagusiak eta Foru Gobernuak LORTEK bisitatu dute, industria eraldaketan duen papera nabarmenduz

Ekainaren 10ean, asteartean, LORTEKek bisita instituzional garrantzitsua jaso zuen: Gipuzkoako Ahaldun Nagusia, Eider Mendoza, eta Foru Aldundiko Gobernu Kontseiluko hainbat ordezkari bertaratu ziren. Bisita hau Goierri eskualdean garatutako jardunaldi baten baitan kokatu zen, eskualdeko berrikuntza, prestakuntza teknologikoa eta industria aurreratuaren ekosistema balioan jartzeko helburuarekin.

Eguna Fundazioa Goierri Eskolan hasi zen, ekitaldi instituzional batekin. Bertan Ordiziako alkateak, Adur Ezenarrok; Diputatu Nagusiak, Eider Mendozak; eta Goierri Fundazioko lehendakariak, Carlos Ormazabalek hartu zuten parte. Jardunaldian zehar, azpimarratu zuten erakundeen, zentro teknologikoen eta enpresen arteko lankidetza funtsezkoa dela euskal industriak aurre egin behar dien trantsizio digital eta energetikoari.

Ondoren, ordezkaritza LORTEKera hurbildu zen, eta han Javier Amezaga lehendakariak, Pedro Álvarez zuzendari nagusiak eta zuzendaritza taldeko beste kide batzuek hartu zituzten. Bisitan zehar, LORTEKeko planta pilotua ezagutzeko aukera izan zuten, eta bertan  zentroak garatzen dituen proiektu adierazgarrienetako batzuk eta bere azpiegitura teknologiko nagusiak erakutsi zitzaizkien.

Bisitan honako hauek nabarmendu ziren: Smartlab-ean egindako demostrazio teknologikoak, elektromugikortasunerako garapenak, metalaren fabrikazio gehigarrian oinarritutako ekonomia zirkularraren inguruko ekimenak (CIRCLE proiektuaren baitan), eta automatizazio aurreratuko teknologietako soluzioak, hala nola laser gantry sistema eta cobot (robot kolaboratiboak) erabilera.

Bisita instituzional honek LORTEKek berrikuntza industriala bultzatzeko, ezagutza aplikatua sortzeko eta euskal enpresa-sarearen lehiakortasuna eta jasangarritasuna indartzeko egiten duen lana aitortzeko balio izan du. Agintariek balorazio oso positiboa egin zuten, zentroaren gaitasuna Industria 4.0-ren erronkei aurre egiteko eragile estrategiko gisa nabarmendu zuten.